ਇਕੱਠਿਆਂ ਪਤੰਗ ਉਡਾਈ, ਡੀਜੇ ਉਤੇ ਭੰਗੜਾ ਪਾਇਆ ਫਿਰ ਕੁੱਟਮਾਰ ਕਰ ਕੇ 22 ਸਾਲਾ ਨੌਜਵਾਨ ਨੂੰ ਉਤਾਰ ਦਿੱਤਾ ਮੌ.ਤ ਦੇ ਘਾਟ
ਵੀਓਪੀ ਬਿਊਰੋ, ਅੰਮ੍ਰਿਤਸਰ- ਪੰਜਾਬ ‘ਚ ਦਿਨ-ਬ-ਦਿਨ ਅਪਰਾਧਿਕ ਵਾਰਦਾਤਾਂ ਵਧਦੀਆਂ ਜਾ ਰਹੀਆਂ ਹਨ। ਬਦਮਾਸ਼ਾਂ ਦੇ ਮਨਾਂ ‘ਚ ਪੁਲਿਸ ਦਾ ਕੋਈ ਡਰ ਨਜ਼ਰ ਨਹੀਂ ਆ ਰਿਹਾ ਹੈ। ਤਾਜਾ ਮਾਮਲਾ ਲੋਹੜੀ ਦੇ ਤਿਉਹਾਰ ਦਾ ਹੈ। ਅੰਮ੍ਰਿਤਸਰ ਦੇ ਫਤਿਹਗੜ੍ਹ ਚੂੜੀਆਂ ਬਾਈਪਾਸ ਨੇੜੇ ਸੰਜੇ ਗਾਂਧੀ ਕਾਲੋਨੀ ‘ਚ 22 ਸਾਲਾ ਨੌਜਵਾਨ ਦਾ ਕ.ਤ.ਲ ਕਰ ਦਿੱਤਾ ਗਿਆ। ਪੁਲਿਸ ਨੇ ਇਸ ਮਾਮਲੇ ਵਿੱਚ ਇੱਕ ਨੂੰ ਗ੍ਰਿਫ਼ਤਾਰ ਕੀਤਾ ਹੈ ਅਤੇ ਮਾਮਲੇ ਦੀ ਜਾਂਚ ਕਰ ਰਹੀ ਹੈ। ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਮ੍ਰਿਤਕ ਨੌਜਵਾਨ ਦੇ ਪਰਿਵਾਰਕ ਮੈਂਬਰਾਂ ਨੇ ਦੱਸਿਆ ਕਿ ਨੌਜਵਾਨ ਦਾ ਨਾਂਅ ਵਿਕਾਸ ਹੈ। ਉਨ੍ਹਾਂ ਦੱਸਿਆ ਕਿ ਵਿਕਾਸ ਨੂੰ ਗੁਆਂਢੀਆਂ ਦੇ ਮੁੰਡਿਆਂ ਨੇ ਪਤੰਗ ਉਡਾਉਣ ਲਈ ਛੱਤ ‘ਤੇ ਬੁਲਾਇਆ ਸੀ। ਸਾਰਾ ਦਿਨ ਇਕੱਠਿਆਂ ਪਤੰਗ ਉਡਾਉਂਦੇ ਰਹੇ, ਸ਼ਰਾਬ ਵੀ ਪੀਤੀ ਤੇ ਡੀਜੇ ਉਤੇ ਭੰਗੜਾ ਵੀ ਪਾਇਆ ਪਰ ਇਸ ਵਿਚਾਲੇ ਉਨ੍ਹਾਂ ਵਿਚ ਝਗੜਾ ਹੋ ਗਿਆ। ਕੁੱਟਮਾਰ ਕਰ ਕੇ ਰਾਤ ਨੂੰ ਗੁਆਂਢੀ ਚੁੱਪ-ਚਾਪ ਉਸ ਨੂੰ ਘਰ ਛੱਡ ਗਿਆ। ਸਵੇਰੇ ਵਿਕਾਸ ਨੇ ਦਮ ਤੋੜ ਦਿੱਤਾ।
ਦੂਜੇ ਪਾਸੇ ਮੌਕੇ ‘ਤੇ ਪਹੁੰਚੇ ਪੁਲਿਸ ਮੁਲਾਜ਼ਮਾਂ ਨੇ ਦੱਸਿਆ ਕਿ ਮ੍ਰਿਤਕ ਨੌਜਵਾਨ ਦੇ ਗੁਆਂਢੀ ਬੌਬੀ ਦੇ ਘਰ ਦੀ ਛੱਤ ‘ਤੇ ਲੋਹੜੀ ਦਾ ਤਿਉਹਾਰ ਮਨਾਇਆ ਜਾ ਰਿਹਾ ਸੀ। ਇਸ ਮੌਕੇ ਉੱਥੇ ਪਤੰਗਬਾਜ਼ੀ ਵੀ ਕੀਤੀ ਜਾ ਰਹੀ ਸੀ। ਇਸ ਦੌਰਾਨ ਕੁਝ ਨੌਜਵਾਨਾਂ ਨੇ ਵਿਕਾਸ ਨੂੰ ਘਰੋਂ ਪਤੰਗ ਉ਼ਡਾਉਣ ਲਈ ਬੁਲਾਇਆ। ਉਸ ਨੂੰ ਛੱਤ ‘ਤੇ ਬੁਲਾ ਕੇ ਉਥੇ ਉਸ ਦੀ ਬੁਰੀ ਤਰ੍ਹਾਂ ਕੁੱਟਮਾਰ ਕਰ ਕੇ ਉਸ ਦਾ ਕ.ਤ.ਲ ਕਰ ਦਿੱਤਾ। ਪੁਲਿਸ ਦਾ ਕਹਿਣਾ ਹੈ ਕਿ ਇਸ ਮਾਮਲੇ ‘ਚ ਉਨ੍ਹਾਂ ਨੇ ਇੱਕ ਵਿਅਕਤੀ ਨੂੰ ਹਿਰਾਸਤ ‘ਚ ਵੀ ਲਿਆ ਹੈ। ਪੁਲਿਸ ਨੇ ਦੱਸਿਆ ਕਿ ਪੀੜਤ ਪਰਿਵਾਰ ਦੇ ਬਿਆਨ ਦਰਜ ਕਰ ਲਏ ਹਨ। ਮ੍ਰਿਤਕ ਨੌਜਵਾਨ ਦੇ ਪਰਿਵਾਰਕ ਮੈਂਬਰਾਂ ਵੱਲੋਂ ਦੱਸਿਆ ਜਾ ਰਿਹਾ ਹੈ ਕਿ ਜਲਦ ਹੀ ਹੋਰ ਮੁਲਜ਼ਮਾਂ ਨੂੰ ਵੀ ਗ੍ਰਿਫ਼.ਤਾਰ ਕਰ ਲਿਆ ਜਾਵੇਗਾ।
