ਕੈਨੇਡਾ ਵਿਚ ਮਾਂ, ਦੋ ਪੁੱਤਾਂ ਸਣੇ 5 ਪੰਜਾਬੀ ਗ੍ਰਿਫ਼ਾਤਰ
ਆਰੋਪੀਆਂ ‘ਤੇ ਨਸ਼ਾ ਅਤੇ ਹਥਿਆਰਾਂ ਦੀ ਤਸਕਰੀ ਦੇ 150ਤੋਂ ਵੱਧ ਮਾਮਲੇ ਦਰਜ
ਵੀਓਪੀ ਬਿਊਰੋ : ਕੈਨੇਡੀਅਨ ਪੁਲਿਸ ਨੇ ਹਥਿਆਰਾਂ ਅਤੇ ਨਸ਼ੀਲੇ ਪਦਾਰਥਾਂ ਦੀ ਤਸਕਰੀ ਦੇ ਦੋਸ਼ ਵਿੱਚ ਇੱਕ ਔਰਤ ਅਤੇ ਉਸਦੇ ਦੋ ਪੁੱਤਰਾਂ ਸਮੇਤ ਪੰਜਾਬ ਮੂਲ ਦੇ ਪੰਜ ਕੈਨੇਡੀਅਨਾਂ ਨੂੰ ਗ੍ਰਿਫਤਾਰ ਕੀਤਾ ਹੈ। ਉਨ੍ਹਾਂ ਕੋਲੋਂ ਅਸਾਲਟ ਰਾਈਫਲਾਂ, ਹੈਂਡਗਨ ਅਤੇ ਇਕ ਸਬਮਸ਼ੀਨ ਗਨ ਸਮੇਤ 11 ਹਥਿਆਰਾਂ ਦੇ ਨਾਲ-ਨਾਲ 900 ਤੋਂ ਵੱਧ ਗੋਲਾ ਬਾਰੂਦ ਬਰਾਮਦ ਕੀਤਾ ਗਿਆ। ਇਹਨਾ ਕੋਲੋਂ ਕਰੀਬ 200 ਗ੍ਰਾਮ ਕੋਕੀਨ, 20 ਗ੍ਰਾਮ ਅਫੀਮ, 80 ਆਕਸੀਕੋਡੋਨ ਗੋਲੀਆਂ ਅਤੇ 100 ਗੋਲੀਆਂ ਬਰਾਮਦ ਕੀਤੀਆਂ ਗਈਆਂ ਹਨ।
ਪੀਲ ਰੀਜਨਲ ਪੁਲਿਸ ਦੁਆਰਾ ਮੀਡੀਆ ਬ੍ਰੀਫ ਦੇ ਅਨੁਸਾਰ, ਗ੍ਰਿਫਤਾਰ ਕੀਤੇ ਗਏ ਮੁਜਰਮਾਂ ਵਿੱਚ ਬਰੈਂਪਟਨ ਨਿਵਾਸੀ ਨਰਿੰਦਰ ਕੌਰ ਨਾਗਰਾ (61) ਅਤੇ ਉਸਦੇ ਦੋ ਪੁੱਤਰ, ਨਵਦੀਪ ਨਾਗਰਾ (20) ਅਤੇ ਰਵਨੀਤ ਨਾਗਰਾ (22) ਦੇ ਨਾਲ-ਨਾਲ ਰਣਵੀਰ ਅਰਾਇਚ (20) ਅਤੇ ਪਵਨੀਤ ਨਾਹਲ (21) ਸ਼ਾਮਲ ਹਨ। ਉਹਨਾਂ ‘ਤੇ ਲਗਭਗ 160 ਉਲੰਘਣਾਵਾਂ ਦਾ ਦੋਸ਼ ਹੈ। ਪੀਲ ਪੁਲਿਸ ਦੇ ਮੁਖੀ ਨਿਸ਼ਾਨ ਦੁਰਈੱਪਾ ਨੇ ਕਿਹਾ ਕਿ ਉਨ੍ਹਾਂ ਨੇ ਪਿਛਲੇ ਸਾਲ ਦੇ ਮੁਕਾਬਲੇ 2024 ਵਿੱਚ ਹੁਣ ਤੱਕ ਵੱਧ ਹਥਿਆਰ ਜ਼ਬਤ ਕੀਤੇ ਹਨ। ਉਨ੍ਹਾਂ ਕਿਹਾ ਕਿ ਚਾਰ ਹਥਿਆਰ ਅਮਰੀਕਾ ਤੋਂ ਅਤੇ ਪੰਜ ਕੈਨੇਡਾ ਤੋਂ ਆਏ ਸਨ। ਸੀਰੀਅਲ ਨੰਬਰ ਦੀ ਸਮੱਸਿਆ ਕਾਰਨ ਬਾਕੀ ਦੋ ਦਾ ਪਤਾ ਨਹੀਂ ਲੱਗ ਸਕਿਆ।
ਰਿਲੀਜ਼ ਵਿੱਚ ਕਿਹਾ ਗਿਆ ਹੈ ਕਿ ਜੁਲਾਈ ਵਿੱਚ ਟ੍ਰੈਫਿਕ ਪੁਲਿਸ ਵੱਲੋਂ ਇੱਕ 20 ਸਾਲਾ ਵਿਅਕਤੀ ਤੋਂ ਇੱਕ ਬੰਦੂਕ ਬਰਾਮਦ ਕਰਨ ਤੋਂ ਬਾਅਦ ਗ੍ਰਿਫਤਾਰੀਆਂ ਸ਼ੁਰੂ ਹੋਈਆਂ। ਇਸ ਤੋਂ ਬਾਅਦ ਜੁਲਾਈ ਅਤੇ ਸਤੰਬਰ ਦੇ ਵਿਚਕਾਰ, ਸਪੈਸ਼ਲ ਇਨਫੋਰਸਮੈਂਟ ਬਿਊਰੋ ਦੇ ਅਫਸਰਾਂ ਨੇ ਪੀਲ ਖੇਤਰ ਅਤੇ ਗ੍ਰੇਟਰ ਟੋਰਾਂਟੋ ਖੇਤਰ ਵਿੱਚ ਨਸ਼ੀਲੇ ਪਦਾਰਥਾਂ ਦੀ ਤਸਕਰੀ ਦੇ ਸ਼ੱਕੀ ਸਮੂਹ ਨੂੰ ਨਿਸ਼ਾਨਾ ਬਣਾਉਣ ਲਈ ਪ੍ਰੋਜੈਕਟ ‘ਸਲੇਜਹੈਮਰ’ ਸ਼ੁਰੂ ਕੀਤਾ। ਜਿਸ ਤੋਂ ਬਾਅਦ ਉਹਨਾਂ ਨੇ ਬਰੈਂਪਟਨ ਵਿੱਚ ਤਿੰਨ ਰਿਹਾਇਸ਼ਾਂ, ਵਾਟਰਲੂ ਵਿੱਚ ਇੱਕ ਰਿਹਾਇਸ਼ ਅਤੇ ਕੈਲੇਡਨ, ਓਨਟਾਰੀਓ ਵਿੱਚ ਇੱਕ ਸਟੋਰੇਜ ਸਹੂਲਤ ‘ਤੇ ਸਰਚ ਵਾਰੰਟ ਕੀਤੇ। ਜਿਸ ਦੌਰਾਨ 11 ਹਥਿਆਰ, 32 ਵਰਜਿਤ ਮੈਗਜ਼ੀਨ, 900 ਤੋਂ ਵੱਧ ਗੋਲਾ ਬਾਰੂਦ, 53 ਗਲੋਕ ਸਿਲੈਕਟਰ ਸਵਿੱਚ ਅਤੇ ਨਸ਼ੀਲੇ ਪਦਾਰਥ ਜ਼ਬਤ ਕੀਤੇ।
