“ਮੇਰਾ ਪਤੀ ਕੁੜੀਆਂ ਨੂੰ ਪਿਆਰ ਦੇ ਚੱਕਰ ‘ਚ ਫਸਾ ਕੇ ਵਿਆਹ ਕਰਵਾਈ ਜਾ ਰਿਹਾ “
ਜਲੰਧਰ (ਵੀਓਪੀ ਬਿਊਰੋ) ਗੁਰਾਇਆ ਦੇ ਪਿੰਡ ਪੱਡੀ ਜਾਗੀਰ ਵਿੱਚ ਇੱਕ ਸ਼ਖਸ ਵਿਆਹਿਆ ਹੋਣ ਦੇ ਬਾਵਜੂਦ ਵੀ ਹੋਰ ਕੁੜੀਆਂ ਨੂੰ ਆਪਣੇ ਪਿਆਰ ਦੇ ਚੱਕਰ ਵਿੱਚ ਪਾ ਕੇ ਵਿਆਹ ਕਰ ਰਿਹਾ ਹੈ। ਇਹ ਇਲਜ਼ਾਮ ਖੁਦ ਉਸ ਦੀ ਪਤਨੀ ਨੇ ਹੀ ਲਾਏ ਹਨ।
ਰਮਨਦੀਪ ਨੇ ਆਪਣੇ ਪਤੀ ਇਸਰਤ ਅਲੀ ਅਤੇ ਉਸਦੇ ਪਰਿਵਾਰ ‘ਤੇ ਗੰਭੀਰ ਦੋਸ਼ ਲਗਾਏ ਹਨ। ਪੀੜਤਾ ਨੇ ਇਨਸਾਫ਼ ਲਈ ਪੁਲਿਸ ਨੂੰ ਅਪੀਲ ਕੀਤੀ ਹੈ। ਪੀੜਤਾ ਦਾ ਦੋਸ਼ ਹੈ ਕਿ ਉਸਨੂੰ ਪ੍ਰੇਮ ਸਬੰਧਾਂ ਵਿੱਚ ਫਸਾਇਆ ਗਿਆ ਅਤੇ ਵਿਆਹ ਕਰਵਾਇਆ ਗਿਆ, ਅਤੇ ਉਸਦੇ ਪਤੀ ਨੇ ਆਪਣੇ ਪਿਛਲੇ ਵਿਆਹਾਂ ਅਤੇ ਤਲਾਕਾਂ ਬਾਰੇ ਸੱਚਾਈ ਉਸ ਤੋਂ ਛੁਪਾਈ।
ਔਰਤ ਦਾ ਕਹਿਣਾ ਹੈ ਕਿ ਜਦੋਂ ਉਸਨੇ ਇਸ ਗੱਲ ਦਾ ਵਿਰੋਧ ਕੀਤਾ ਅਤੇ ਸਵਾਲ ਕੀਤਾ ਤਾਂ ਇਸਰਤ ਅਲੀ ਨੇ ਉਸਨੂੰ ਇਹ ਕਹਿ ਕੇ ਧੋਖਾ ਦਿੱਤਾ ਕਿ ਲੋਕ ਝੂਠ ਬੋਲ ਰਹੇ ਹਨ ਅਤੇ ਉਨ੍ਹਾਂ ਦਾ ਘਰ ਤੋੜਨ ਦੀ ਕੋਸ਼ਿਸ਼ ਕਰ ਰਹੇ ਹਨ। ਉਹ ਇਸ ਵਿਸ਼ਵਾਸ ਵਿੱਚ ਉਸਦੇ ਨਾਲ ਰਹਿੰਦੀ ਰਹੀ। ਉਨ੍ਹਾਂ ਦਾ ਇੱਕ 18 ਮਹੀਨੇ ਦਾ ਬੱਚਾ ਹੈ, ਅਤੇ ਉਹ ਇਸ ਸਮੇਂ ਛੇ ਮਹੀਨੇ ਦੀ ਗਰਭਵਤੀ ਹੈ। ਇਸ ਦੌਰਾਨ, ਉਸਨੂੰ ਪਤਾ ਲੱਗਾ ਕਿ ਉਸਦਾ ਪਤੀ ਉਸਨੂੰ ਛੱਡ ਕੇ ਕਿਸੇ ਹੋਰ ਔਰਤ ਨਾਲ ਵਿਆਹ ਕਰਨ ਦੀ ਯੋਜਨਾ ਬਣਾ ਰਿਹਾ ਹੈ।
ਪੁਲਿਸ ਨੇ ਪੀੜਤਾ ਦੀ ਸ਼ਿਕਾਇਤ ‘ਤੇ ਮਾਮਲਾ ਦਰਜ ਕਰ ਲਿਆ ਹੈ ਅਤੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।
