PGI ‘ਚ ਲੱਗੀ ਭਿਆਨਕ ਅੱਗ, 5 ਮੰਜ਼ਿਲਾਂ ‘ਚ ਫੈਲਿਆ ਧੂੰਆਂ, ਫਾਇਰ ਬ੍ਰਿਗੇਡ ਨੇ ਸੰਭਾਲਿਆ ਮੋਰਚਾ, ਸੈਂਕੜੇ ਮਰੀਜ਼…

PGI ‘ਚ ਲੱਗੀ ਭਿਆਨਕ ਅੱਗ, 5 ਮੰਜ਼ਿਲਾਂ ‘ਚ ਫੈਲਿਆ ਧੂੰਆਂ, ਫਾਇਰ ਬ੍ਰਿਗੇਡ ਨੇ ਸੰਭਾਲਿਆ ਮੋਰਚਾ, ਸੈਂਕੜੇ ਮਰੀਜ਼…

ਵੀਓਪੀ ਬਿਊਰੋ – ਚੰਡੀਗੜ੍ਹ ਦੇ ਮੁੱਖ ਹਸਪਤਾਲ ਪੀਜੀਆਈ ਵਿੱਚ ਅੱਜ ਸਵੇਰੇ ਭਿਆਨਕ ਅੱਗ ਲੱਗ ਗਈ, ਜਿਸ ਕਾਰਨ ਨਹਿਰੂ ਬਲਾਕ ਦੀਆਂ 5 ਮੰਜ਼ਿਲਾਂ ਵਿੱਚ ਧੂੰਆਂ ਫੈਲ ਗਿਆ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਪੀਜੀਆਈ ਦੇ ਨਹਿਰੂ ਬਲਾਕ ਵਿੱਚ ਇਹ ਅੱਗ ਰਾਤ ਕਰੀਬ ਸਾਢੇ 12 ਵਜੇ ਲੱਗੀ।

ਫਿਲਹਾਲ ਦੱਸਿਆ ਜਾ ਰਿਹਾ ਹੈ ਕਿ ਅੱਗ ਸਭ ਤੋਂ ਪਹਿਲਾਂ ਗਰਾਊਂਡ ਫਲੋਰ ‘ਤੇ ਸਥਿਤ UPM ‘ਚ ਲੱਗੀ ਅਤੇ ਕੁਝ ਹੀ ਸਮੇਂ ‘ਚ ਨਹਿਰੂ ਬਲਾਕ ਦੀਆਂ 5 ਮੰਜ਼ਿਲਾਂ ਤੱਕ ਧੂੰਆਂ ਫੈਲ ਗਿਆ। ਖੁਸ਼ਕਿਸਮਤੀ ਵਾਲੀ ਗੱਲ ਹੈ ਕਿ ਇਸ ਭਿਆਨਕ ਅੱਗ ਵਿੱਚ ਕੋਈ ਜਾਨੀ ਜਾਂ ਮਾਲੀ ਨੁਕਸਾਨ ਨਹੀਂ ਹੋਇਆ। ਇਸ ਦੌਰਾਨ ਮਰੀਜ਼ਾਂ ਨੂੰ ਨਹਿਰੂ ਬਲਾਕ ਵਿੱਚੋਂ ਬਾਹਰ ਕੱਢਿਆ ਗਿਆ ਕਿਉਂਕਿ ਧੂੰਏਂ ਕਾਰਨ ਉਨ੍ਹਾਂ ਨੂੰ ਸਾਹ ਲੈਣ ਵਿੱਚ ਮੁਸ਼ਕਲ ਆ ਰਹੀ ਸੀ ਅਤੇ ਉਨ੍ਹਾਂ ਦੀਆਂ ਅੱਖਾਂ ਵਿੱਚ ਜਲਨ ਵੀ ਹੋ ਰਹੀ ਸੀ।

ਦੱਸਿਆ ਜਾ ਰਿਹਾ ਹੈ ਕਿ ਪੀਜੀਆਈ ਦੇ ਇਤਿਹਾਸ ਵਿੱਚ ਇਹ ਪਹਿਲੀ ਵਾਰ ਹੈ ਜਦੋਂ ਹਸਪਤਾਲ ਵਿੱਚ ਇੰਨੀ ਵੱਡੀ ਅੱਗ ਲੱਗੀ ਹੈ। ਅੱਗ ਲੱਗਣ ਦੀ ਸੂਚਨਾ ਮਿਲਦੇ ਹੀ ਹਸਪਤਾਲ ‘ਚ ਮੌਜੂਦ ਅੰਦਰੂਨੀ ਫਾਇਰ ਸਟੇਸ਼ਨ ਨੇ ਅੱਗ ‘ਤੇ ਕਾਬੂ ਪਾਉਣ ਦੀ ਕੋਸ਼ਿਸ਼ ਕੀਤੀ ਪਰ ਅਜਿਹਾ ਨਹੀਂ ਹੋ ਸਕਿਆ, ਇਸ ਲਈ ਬਾਅਦ ‘ਚ ਚੰਡੀਗੜ੍ਹ ਫਾਇਰ ਸਟੇਸ਼ਨ ਨੂੰ ਸੂਚਿਤ ਕੀਤਾ ਗਿਆ ਅਤੇ ਫਾਇਰ ਟੈਂਡਰਾਂ ਨੂੰ ਬੁਲਾਇਆ ਗਿਆ।

ਅੱਗ ਲੱਗਣ ਦੀ ਸੂਚਨਾ ਮਿਲਦੇ ਹੀ ਫਾਇਰ ਬ੍ਰਿਗੇਡ ਨੇ ਮੌਕੇ ‘ਤੇ ਪਹੁੰਚ ਕੇ ਬਚਾਅ ਕਾਰਜ ਸ਼ੁਰੂ ਕਰ ਦਿੱਤੇ। ਇਸ ਦੌਰਾਨ ਇੰਟਰਨਲ ਮੈਡੀਸਨ ਦੇ ਪ੍ਰੋਫੈਸਰ ਸੰਜੇ ਜੈਨ ਮੌਕੇ ‘ਤੇ ਪਹੁੰਚੇ ਅਤੇ ਉਨ੍ਹਾਂ ਦੇ ਨਾਲ ਐੱਸਡੀਐੱਮ ਸਾਊਥ ਵੀ ਮੌਕੇ ‘ਤੇ ਪਹੁੰਚੇ। ਰਾਤ 2 ਵਜੇ ਤੱਕ ਇਮਾਰਤ ‘ਚ ਧੂੰਆਂ ਛਾਇਆ ਰਿਹਾ ਅਤੇ 2 ਵਜੇ ਦੇ ਕਰੀਬ ਮੌਸਮ ‘ਚ ਬਦਲਾਅ ਕਾਰਨ ਲੋਕਾਂ ਨੂੰ ਰਾਹਤ ਮਿਲੀ।