ਭਾਰਤ ਦੇ ਰੋਹਨ ਬੋਪੰਨਾ ਨੇ 43 ਸਾਲ ਦੀ ਉਮਰ ‘ਚ ਆਸਟ੍ਰੇਲੀਆ ਓਪਨ ਜਿੱਤ ਕੇ ਰਚ’ਤਾ ਇਤਿਹਾਸ
ਮੈਲਬੋਰਨ (ਵੀਓਪੀ ਬਿਊਰੋ) : ਭਾਰਤ ਦੇ ਦਿੱਗਜ ਟੈਨਿਸ ਸਟਾਰ ਰੋਹਨ ਬੋਪੰਨਾ ਦਾ ਸੁਪਨਾ ਆਖਿਰਕਾਰ ਸਾਕਾਰ ਹੋ ਗਿਆ ਹੈ। ਬੋਪੰਨਾ ਨੇ ਆਸਟ੍ਰੇਲੀਅਨ ਓਪਨ ‘ਚ ਪੁਰਸ਼ ਡਬਲਜ਼ ਦਾ ਖਿਤਾਬ ਜਿੱਤ ਕੇ ਇਤਿਹਾਸ ਰਚ ਦਿੱਤਾ ਹੈ। ਸ਼ਨੀਵਾਰ, 27 ਜਨਵਰੀ ਨੂੰ ਮੈਲਬੌਰਨ ਪਾਰਕ ‘ਚ ਹੋਏ ਫਾਈਨਲ ‘ਚ ਬੋਪੰਨਾ ਅਤੇ ਉਸ ਦੇ ਆਸਟ੍ਰੇਲੀਆਈ ਜੋੜੀਦਾਰ ਮੈਥਿਊ ਐਬਡੇਨ ਨੇ ਸਿਮੋਨ ਬੋਲੇਲੀ ਅਤੇ ਆਂਦਰੇ ਵਾਵਾਸੋਰੀ ਦੀ ਇਟਲੀ ਦੀ ਜੋੜੀ ਨੂੰ 7-5, 7-5 ਨਾਲ ਹਰਾ ਕੇ ਖਿਤਾਬ ਜਿੱਤਿਆ।
ਇਸ ਜਿੱਤ ਨਾਲ ਬੋਪੰਨਾ ਨੇ ਆਪਣੇ ਕਰੀਅਰ ‘ਚ ਪਹਿਲੀ ਵਾਰ ਪੁਰਸ਼ ਡਬਲਜ਼ ਗ੍ਰੈਂਡ ਸਲੈਮ ਖਿਤਾਬ ਜਿੱਤਿਆ। ਇੰਨਾ ਹੀ ਨਹੀਂ ਉਨ੍ਹਾਂ ਨੇ 43 ਸਾਲ ਦੀ ਉਮਰ ‘ਚ ਇਹ ਖਿਤਾਬ ਜਿੱਤ ਕੇ ਰਿਕਾਰਡ ਕਾਇਮ ਕੀਤਾ। ਉਹ ਗਰੈਂਡ ਸਲੈਮ ਵਿੱਚ ਪੁਰਸ਼ਾਂ ਦੇ ਕਿਸੇ ਵੀ ਟੂਰਨਾਮੈਂਟ ਦਾ ਖਿਤਾਬ ਜਿੱਤਣ ਵਾਲਾ ਸਭ ਤੋਂ ਵੱਧ ਉਮਰ ਦਾ ਖਿਡਾਰੀ ਬਣ ਗਿਆ।
ਪਿਛਲਾ ਰਿਕਾਰਡ ਨੀਦਰਲੈਂਡ ਦੇ ਜੀਨ-ਜੂਲੀਅਨ ਰੋਜਰ ਦੇ ਕੋਲ ਸੀ, ਜਿਸ ਨੇ 40 ਸਾਲ ਅਤੇ ਨੌਂ ਮਹੀਨਿਆਂ ਦੀ ਉਮਰ ਵਿੱਚ 2022 ਫ੍ਰੈਂਚ ਓਪਨ ਵਿੱਚ ਪੁਰਸ਼ ਡਬਲਜ਼ ਦਾ ਖਿਤਾਬ ਜਿੱਤਣ ਲਈ ਮਾਰਸੇਲੋ ਅਰੇਵੋਲਾ ਨਾਲ ਸਾਂਝੇਦਾਰੀ ਕੀਤੀ ਸੀ। ਰੋਹਨ ਬੋਪੰਨਾ ਨੇ 2017 ਵਿੱਚ ਮਿਕਸਡ ਡਬਲਜ਼ ਵਿੱਚ ਫਰੈਂਚ ਓਪਨ ਦਾ ਖਿਤਾਬ ਜਿੱਤਿਆ ਹੈ।
ਬੋਪੰਨਾ ਨੇ ਫਿਰ ਗੈਬਰੀਲਾ ਡਾਬਰੋਵਸਕੀ ਨਾਲ ਮਿਲ ਕੇ ਅੰਨਾ-ਲੇਨਾ ਗ੍ਰੋਨੇਫੀਲਡ ਅਤੇ ਰੌਬਰਟ ਫਰਾਹ ਨੂੰ 2-6, 6-2, [12-10] ਨਾਲ ਹਰਾਇਆ। ਬੋਪੰਨਾ ਨੇ ਆਸਟ੍ਰੇਲੀਅਨ ਓਪਨ ਦੇ ਅੰਤ ਤੱਕ ਨੰਬਰ 1 ਸਥਾਨ ਹਾਸਲ ਕਰ ਲਿਆ ਹੈ। ਇਸ ਦੇ ਨਾਲ ਹੀ ਬੋਪੰਨਾ ਦੇ ਸਭ ਤੋਂ ਸਫਲ ਸਾਥੀਆਂ ‘ਚੋਂ ਇਕ ਮੈਥਿਊ ਐਬਡੇਨ ਦਾ ਪੁਰਸ਼ ਡਬਲਜ਼ ਰੈਂਕਿੰਗ ‘ਚ ਨੰਬਰ 2 ‘ਤੇ ਪਹੁੰਚਣਾ ਯਕੀਨੀ ਹੈ। ਮੈਥਿਊ ਐਬਡੇਨ ਇੱਕ ਆਸਟ੍ਰੇਲੀਆਈ ਖਿਡਾਰੀ ਹੈ।
