ਸੀਟੀ ਪਬਲਿਕ ਸਕੂਲ ਮਕਸੂਦਾਂ ‘ਚ ਮਹਿਲਾ ਅਧਿਆਪਕਾ ਨੇ ਬੱਚਿਆਂ ਦੇ ਲੁਹਾਏ ਕੜੇ, ਸਿੱਖ ਤਾਲਮੇਲ ਕਮੇਟੀ ਪਹੁੰਚੀ ਮੌਕੇ ‘ਤੇ, ਕੀਤੀ ਕਾਰਵਾਈ ਦੀ ਮੰਗ…
ਜਲੰਧਰ (ਰੰਗਪੁਰੀ) ਜਲੰਧਰ ਦਾ ਸੀਟੀ ਗਰੁੱਪ ਹਰ ਸਮੇਂ ਕਿਸੇ ਨਾ ਕਿਸੇ ਵਿਵਾਦਾਂ ਵਿਚ ਰਹਿੰਦਾ ਹੈ। ਇਸ ਵਾਰ ਵੀ ਅਜਿਹਾ ਹੀ ਇਕ ਮਾਮਲਾ ਸਾਹਮਣੇ ਆਇਆ ਹੈ, ਜਿੱਥੇ ਸੀਟੀ ਪਬਲਿਕ ਸਕੂਲ ਮਕਸੂਦਾਂ ਜਲੰਧਰ ਦੀ ਇਕ ਮਹਿਲਾ ਅਧਿਆਪਕਾ ਨੇ 8-10 ਸਿੱਖ ਬੱਚਿਆਂ ਦੇ ਕੜੇ ਲਹਾ ਦਿੱਤੇ। ਘਟਨਾ ਪਿੱਛੇ ਕੋਈ ਵੱਡਾ ਕਾਰਨ ਵੀ ਨਹੀਂ ਸੀ ਜਦ ਉਕਤ ਬੱਚੇ ਕੜੇ ਪਹਿਨ ਕੇ ਸਕੂਲ ਆਏ ਤਾਂ ਉਕਤ ਅਧਿਆਪਕਾ ਨੇ ਕਿਹਾ ਸਕੂਲ ਵਿਚ ਕੜੇ ਪਾਉਣ ਦੀ ਇਜਾਜ਼ਤ ਨਹੀਂ ਹੈ, ਇਸ ਲਈ ਇਹਨਾਂ ਨੂੰ ਉਤਾਰ ਦੇਵੋ। ਇਕ ਵਾਰ ਤਾਂ ਬੱਚਿਆਂ ਨੇ ਇਸ ਨੂੰ ਆਪਣੇ ਸਿੱਖੀ ਸਰੂਪ ਦਾ ਹਿੱਸਾ ਦੱਸਿਆ ਪਰ ਅਧਿਆਪਕਾ ਨਾ ਮੰਨੀ ਅਤੇ ਉਸ ਨੇ ਬੱਚਿਆਂ ਦੇ ਕੜੇ ਲਹਾ ਲਏ।
ਇਸ ਤੋਂ ਬਾਅਦ ਬੱਚਿਆਂ ਨੇ ਆਪਣੇ ਮਾਪਿਆਂ ਨੂੰ ਘਟਨਾ ਬਾਰੇ ਦੱਸਿਆ ਤਾਂ ਇਹ ਗੱਲ ਸਿੱਖ ਤਾਲਮੇਲ ਕਮੇਟੀ ਕੋਲ ਪਹੁੰਚ ਗਈ ਅਤੇ ਉਹਨਾਂ ਨੇ ਇਸ ਬੇਅਦਬੀ ਦਾ ਸਖਤ ਨੋਟਿਸ ਲੈਂਦੇ ਹੋਏ ਸਕੂਲ ਪ੍ਰਬੰਧਕਾਂ ਤੇ ਉਕਤ ਅਧਿਆਪਕਾ ਖਿਲਾਫ ਮੋਰਚਾ ਖੋਲ ਦਿੱਤਾ। ਉਹਨਾਂ ਨੇ ਕਿਹਾ ਕਿ ਕੜਾ ਸਿੱਖਾਂ ਦੇ ਸਰੂਪ ਦਾ ਇਕ ਹਿੱਸਾ ਹੈ ਅਤੇ ਅਧਿਆਪਕਾ ਨੇ ਅਜਿਹੀ ਗਲਤੀ ਕਰ ਕੇ ਚੰਗਾ ਨਹੀਂ ਕੀਤਾ ਹੈ। ਇਸ ਮਾਮਲੇ ਵਿਚ ਉਹਨਾਂ ਨੇ ਪੁਲਿਸ ਨੂੰ ਸ਼ਿਕਾਇਤ ਕਰ ਕੇ ਕਿਸੇ ਦੀਆਂ ਧਾਰਮਿਕ ਭਾਵਨਾਵਾਂ ਭੜਕਾਉਣ ਲਈ ਮਾਮਲਾ ਦਰਜ ਕਰਨ ਦੀ ਮੰਗ ਕੀਤੀ ਹੈ।
