ਖਰਾਬ ਪ੍ਰਦਰਸ਼ਨ ਤੋਂ ਬਾਅਦ ਵਾਪਿਸ ਗਈ ਪਾਕਿਸਤਾਨੀ ਟੀਮ ਦੇ ਕਪਤਾਨ ਨੇ ਦਿੱਤਾ ਅਸਤੀਫਾ… ਕਹਿੰਦਾ ਮੈਂ ਨੰਬਰ-1 ਬੱਲੇਬਾਜ਼ ਸੀ ਪਰ…
ਇਸਲਾਮਾਬਾਦ (ਵੀਓਪੀ ਬਿਊਰੋ)- ਵਿਸ਼ਵ ਕੱਪ ਕ੍ਰਿਕਟ ਵਿੱਚ ਖ਼ਰਾਬ ਪ੍ਰਦਰਸ਼ਨ ਕਾਰਨ ਪਾਕਿਸਤਾਨ ਕ੍ਰਿਕਟ ਟੀਮ ਲਈ ਬੁਰੀ ਖ਼ਬਰ ਹੈ। ਟੀਮ ਦੇ ਕਪਤਾਨ ਬਾਬਰ ਆਜ਼ਮ ਨੇ ਪਾਕਿਸਤਾਨ ਦੀ ਕਪਤਾਨੀ ਤੋਂ ਅਸਤੀਫਾ ਦੇ ਦਿੱਤਾ ਹੈ। ਬਾਬਰ ਨੇ ਕ੍ਰਿਕਟ ਦੇ ਤਿੰਨੋਂ ਫਾਰਮੈਟਾਂ ਤੋਂ ਅਸਤੀਫਾ ਦੇ ਦਿੱਤਾ ਹੈ। ਉਨ੍ਹਾਂ ਨੇ ਬੁੱਧਵਾਰ ਨੂੰ ਇਕ ਨੋਟ ਰਾਹੀਂ ਅਸਤੀਫਾ ਦੇ ਦਿੱਤਾ। ਇਸ ‘ਚ ਉਨ੍ਹਾਂ ਲਿਖਿਆ ਕਿ ਇਹ ਫੈਸਲਾ ਲੈਣ ਦਾ ਇਹ ਸਹੀ ਸਮਾਂ ਹੈ।
ਬਾਬਰ ਨੇ ਲਿਖਿਆ, “ਮੈਨੂੰ ਚੰਗੀ ਤਰ੍ਹਾਂ ਯਾਦ ਹੈ ਜਦੋਂ ਮੈਨੂੰ ਪੀਸੀਬੀ ਨੇ 2019 ਵਿੱਚ ਪਾਕਿਸਤਾਨ ਦੀ ਕਪਤਾਨੀ ਲਈ ਸੱਦਾ ਦਿੱਤਾ ਸੀ। ਪਿਛਲੇ ਚਾਰ ਸਾਲਾਂ ‘ਚ ਮੈਂ ਮੈਦਾਨ ‘ਤੇ ਅਤੇ ਬਾਹਰ ਕਈ ਉਤਰਾਅ-ਚੜ੍ਹਾਅ ਦੇਖੇ ਹਨ, ਪਰ ਮੈਂ ਆਪਣੇ ਪੂਰੇ ਦਿਲ ਅਤੇ ਜਨੂੰਨ ਨਾਲ ਕ੍ਰਿਕਟ ਜਗਤ ‘ਚ ਪਾਕਿਸਤਾਨ ਦਾ ਮਾਣ ਬਰਕਰਾਰ ਰੱਖਣ ਦਾ ਟੀਚਾ ਰੱਖਿਆ। ਵ੍ਹਾਈਟ-ਬਾਲ ਕ੍ਰਿਕਟ ‘ਚ ਨੰਬਰ ਇਕ ਟੀਮ ਬਣਨਾ ਖਿਡਾਰੀਆਂ, ਕੋਚਾਂ ਅਤੇ ਪ੍ਰਬੰਧਨ ਦੇ ਸਾਂਝੇ ਯਤਨਾਂ ਦਾ ਨਤੀਜਾ ਸੀ ਪਰ ਮੈਂ ਪਾਕਿਸਤਾਨ ਦੇ ਕ੍ਰਿਕਟ ਪ੍ਰਸ਼ੰਸਕਾਂ ਦਾ ਵੀ ਧੰਨਵਾਦ ਕਰਨਾ ਚਾਹਾਂਗਾ ਕਿਉਂਕਿ ਉਨ੍ਹਾਂ ਨੇ ਇਸ ਸਫਰ ‘ਚ ਮੇਰਾ ਬਹੁਤ ਸਾਥ ਦਿੱਤਾ।” ਬਾਬਰ ਨੇ ਵਿਸ਼ਵ ਕੱਪ 2023 ਵਿੱਚ ਚੰਗਾ ਪ੍ਰਦਰਸ਼ਨ ਨਹੀਂ ਕੀਤਾ ਅਤੇ ਨੌਂ ਮੈਚਾਂ ਵਿੱਚ ਉਸਨੇ 40 ਦੀ ਔਸਤ ਨਾਲ ਸਿਰਫ 320 ਦੌੜਾਂ ਬਣਾਈਆਂ।
ਪਾਕਿਸਤਾਨ ਨੇ ਟੂਰਨਾਮੈਂਟ ‘ਚ ਖੇਡੇ ਗਏ ਨੌਂ ਮੈਚਾਂ ‘ਚੋਂ ਪੰਜ ਹਾਰੇ ਅਤੇ ਸਿਰਫ ਚਾਰ ਜਿੱਤੇ। ਉਹ ਅੱਠ ਅੰਕਾਂ ਨਾਲ ਟੂਰਨਾਮੈਂਟ ਨੂੰ ਪੰਜਵੇਂ ਸਥਾਨ ‘ਤੇ ਰਿਹਾ। ਬਾਬਰ ਨੇ ਅੱਗੇ ਲਿਖਿਆ, ”ਅੱਜ ਮੈਂ ਸਾਰੇ ਫਾਰਮੈਟਾਂ ‘ਚ ਪਾਕਿਸਤਾਨ ਦੀ ਕਪਤਾਨੀ ਛੱਡ ਰਿਹਾ ਹਾਂ। ਇਹ ਇੱਕ ਸਖ਼ਤ ਫੈਸਲਾ ਹੈ, ਪਰ ਮੈਨੂੰ ਲੱਗਦਾ ਹੈ ਕਿ ਇਸ ਲਈ ਸਮਾਂ ਸਹੀ ਹੈ।
ਮੈਂ ਪਾਕਿਸਤਾਨ ਲਈ ਤਿੰਨਾਂ ਫਾਰਮੈਟਾਂ ‘ਚ ਬਤੌਰ ਖਿਡਾਰੀ ਖੇਡਦਾ ਰਹਾਂਗਾ। ਮੈਂ ਆਪਣੇ ਤਜ਼ਰਬੇ ਅਤੇ ਸਮਰਪਣ ਨਾਲ ਨਵੇਂ ਕਪਤਾਨ ਅਤੇ ਟੀਮ ਦਾ ਸਮਰਥਨ ਕਰਨ ਲਈ ਇੱਥੇ ਹਾਂ। ਮੈਂ ਇਸ ਜ਼ਿੰਮੇਵਾਰੀ ਲਈ ਮੇਰੇ ‘ਤੇ ਭਰੋਸਾ ਦਿਖਾਉਣ ਲਈ ਪਾਕਿਸਤਾਨ ਕ੍ਰਿਕਟ ਬੋਰਡ ਦਾ ਵੀ ਧੰਨਵਾਦ ਕਰਨਾ ਚਾਹਾਂਗਾ।”
